ព័ត៌មាន​ទូទៅ
          
បន្ទាប់ពីលេចឮដំណឹងថាកញ្ញា សេង រដ្ឋា ប្រកាសលាលែងពីតំណែង ក្រុមហ៊ុនបានចេញសេចក្ដីប្រកាសមួយ

(ភ្នំពេញ)៖ បន្ទាប់ពីមានការផ្ទុះលេចឮដំណឹងដោយមានការចែករំលែកពេញបណ្ដាញសង្គមហ្វេសប៊ុកថាកញ្ញា សេង រដ្ឋា Miss Grand Cambodia 2020 បានប្រកាសលាលែងចេញពីតំណែង។ នាព្រឹកថ្ងៃទី២០ ខែមករា ឆ្នាំ២០២១នេះខាងក្រុមហ៊ុនបានចេញសេចក្ដីប្រកាសមួយនៅលើផេកផ្លូវរបស់កម្មវិធី Miss Grand Cambodia ថាមិនទទួលដឹងឮចំពោះរឿងនេះ ដូចអ្វីដែលផេកមួយចំនួនដែលបានផុសបំផុសបំផុលធ្វើឱ្យមានការភាន់ច្រឡំនោះទេ។ យ៉ាងណាមិញភាគីក្រុមហ៊ុនមិនទាន់បានជួបជាមួយនឹងកញ្ញា សេង រដ្ឋា នៅឡើយទេ។ បញ្ជាក់ កាលពីម្សិលមិញនេះខាងក្រុមហ៊ុនបានចេញលិខិតអញ្ជើញកញ្ញា សេង រដ្ឋា ចូលមកក្រុមហ៊ុនដើម្បីធ្វើការដោះស្រាយគ្នាតាមសន្តិវិធី ប៉ុន្តែខាងកញ្ញាមិនបានមកតាមការអញ្ជើញរបស់ក្រុមហ៊ុនទេ ថែមទាំងបានផុស Status មួយថា នឹងចូលជួបខាងក្រុមហ៊ុននៅថ្ងៃសន្និសីទកាសែតតែប៉ុណ្ណោះ ដែលប្រព្រឹត្តិឡើងដោយកាលបរិច្ឆេទណាមួយច្បាស់លាស់។

 

 

 

 

សូមអានសេចក្ដីប្រកាសខាងក្រោម៖

ក្រុមហ៊ុនសូមបកស្រាយជុំវិញនិងរឿងរ៉ាវ លិខិតអញ្ជើញរបស់ក្រុមហ៊ុនដែលបានផ្ញើរជូន កញ្ញា សេង រដ្ឋា គឺមិនមែនបញ្ជា រឺ ស្នើរសុំអោយគាត់លាលែងពីតំណែងនោះទេ ហើយដែលកញ្ញា សេង រដ្ឋាគាត់បានសរសេរលើបណ្តាញសង្គមថាក្រុមហ៊ុនបរិហារកេរ្តិ៍ និង បានប្រកាសជាសាធារណៈអោយគាត់លាលែងពីតំណែងនោះ គឺខាងក្រុមហ៊ុនសូមធ្វើការបដិសេដទាំងស្រុង កន្លងមកមានផេកមួយចំនួនដើម្បីចង់បានភាពល្បីល្បាញរបស់ខ្លួនបានយកឈ្មោះក្រុមហ៊ុនលេងសើចលើបណ្តាញសង្គម បំផុសបំផុល ផ្សាយព័ត៌មានដែលមែនជាការពិត អោយប្រជាជនខ្មែរមើលមុខគ្នាមិនចំ ចោទក្រុមហ៊ុនថាមិនមានទំនួលខុសត្រូវលើកញ្ញា សេង រដ្ឋា ដែលបានប្រឡងចប់ហើយហេតុអ្វីមិនទទួលបានប្រាក់រង្វាន់? ក្រុមហ៊ុនសុំសួរទៅអ្នកទាំងអស់គ្នាវិញថា នៅពេលដែលភាគីខាងក្រុមហ៊ុន ធ្វើការកុងត្រាជាមួយនិងភាគីកញ្ញា សេង រដ្ឋា តើអ្នកទាំងអស់គ្នាបាននៅទីនោះដែររឺទេ? ក្រុមហ៊ុនបានធ្វើការកុងត្រា និងបាននិយាយផ្ទាល់ជាមួយកញ្ញា សេង រដ្ឋា រួចរាល់អស់ហើយ ទាល់តែកម្មវិធីប្រឡងនៅលើឆាកអន្តរជាតិបានបញ្ចប់ទើបខាងក្រុមហ៊ុនប្រគល់ប្រាក់រង្វាន់ជូនកញ្ញាសេង រដ្ឋា ព្រោះនេះជាគោលការណ៍របស់ក្រុមហ៊ុន ជៀសវាងកំហុសខុសឆ្គងរបស់គាត់កើតឡើងនៅពេលណាមួយ គឺខាងក្រុមហ៊ុននឹងផ្ទេរតំណែងរបស់គាត់ជូនទៅអ្នកជាប់លេខបន្ទាប់ពីគាត់ ប្រសិនអ្នកបន្ទាប់ធ្វើខុសលក្ខខណ្ខរបស់ក្រុមហ៊ុនទៀតគឺក្រុមហ៊ុនមានសិទ្ធដកតំណែងរបស់គាត់ទៅអ្នកបន្តបន្ទាប់ទៀត ដូច្នេះប្រាក់រង្វាន់ក៏បានទៅអ្នកបន្ទាប់ដូចគ្នា ហើយអ្នកដែលបានក្រុមហ៊ុនដកតំណែងគឺមិនទួលបានប្រាក់រង្វាន់ឡើយ ដោយសារក្រុមហ៊ុនបានមើលឃើញកញ្ញា សេង រដ្ឋា ធ្វើខុសលក្ខខណ្ឌ នៅក្នុងកុងត្រារបស់ក្រុមហ៊ុនដែលបានចែងមួយចំនួន ទើបក្រុមហ៊ុនបានចេញលិខិតអញ្ជើញគាត់មកកាន់ការិយាល័យរបស់ផលិតកម្មមហាហង្សផ្ទាល់ដើម្បីដោះស្រាយគ្នាដោយសន្តិវិធី វែកញែករកកំហុសរបស់គាត់ និងរបស់ក្រុមហ៊ុន បើគាត់បកស្រាយមកថាក្រុមហ៊ុនមានកំហុសកន្លែងណាមួយដែលគាត់មិនពេញចិត្តធ្វើអោយប៉ះពាល់ដល់កិត្តិយសរបស់គាត់ គឺខាងក្រុមហ៊ុននឹងធ្វើការសុំទោសជាសាធារណៈ ប្រសិនបើក្រុមហ៊ុនបកស្រាយរាល់កំហុសរបស់កញ្ញា សេង រដ្ឋា ដែលបានធ្វើខុសនិងលក្ខខណ្ឌ ប៉ះពាល់ដល់កិត្តិយសក្រុមហ៊ុនដូចគ្នានោះកញ្ញា សេង រដ្ឋា នឹងធ្វើការសុំទោសជាសាធារណៈដូចគ្នា ក្រុមហ៊ុនបានព្យាយាមសម្របសម្រួលដោយសន្តិវិធី ប៉ុន្តែកញ្ញា សេង រដ្ឋា មិនបានផ្តល់កិត្តិយសជូនក្រុមហ៊ុនចូលខ្លួនដើម្បីដោះស្រាយនោះទេ ប្រសិនជាកញ្ញា សេង រដ្ឋា បានប្រកាសលើបណ្តាញសង្គមសម្រេចលាលែងពីតំណែង គឺខាងក្រុមហ៊ុនសុំមិនទទួលដឹងលឺឡើយ ព្រោះខាងក្រុមហ៊ុនមិនទាន់បាននិយាយអ្វីទាំងអស់ជាមួយគាត់នោះទេ៕

 

 

 

 

 

 

អត្ថបទ៖ Rith

មតិយោបល់
បញ្ចេញមតិយោបល់